Latest News Editor's Choice


News / Religion

Amaziyoni nqunulisiyani omama ligwaz-umhlaba!

by Johas Moyo
25 Feb 2016 at 19:07hrs | Views
IZAKHAMIZI zeCowdray Park koBulawayo zithukuthele ngendlela amanye amadoda amathathu akhulekisa abesintwana ngokubanqunulisa andubana abagezise egcekeni osokubangela ukuthi izakhamizi zehluleke ukuquma kuleyondawo ngoba zisesaba ukuhlangana lamanina ebhunyumunyu.

Kubikwa amadoda la aziwa ngokuthi Mdawini, uNkosi lo Thomas nje kuphela kusa kwamalanga agezisa abantu, ikakhulu amanina benqunu bethi babakhipha umnyama emini ligwaze umhlaba. Izakhamizi sezikhalaze zaze zadinwa ngokuthi zifuna amadoda la abotshelwe ukuganga kwawo lokhu osokusehlisa lesithunzi selokitshi leCowdray Park kunye leLuveve.

UMnumzana Mkhululi Ndlela ohlala eNew Luveve ongomunye wezakhamizi ukhalaze kakhulu ngomonakalo osudalwe yilaba baphurofethi abamxhwalisela umntanakhe oyintombazane uKelly Moyo owacina esetshontsha lemali endlini waze wamxotsha.

"Ngizwa ngilokudana nxa ngikhumbula ngomntanami, sengaze ngamxotsha endlini ngoba engasangilaleli ngendaba zabaphurofethi laba, wayesegila imikhuba engapheliyo okugoqela ukutshontsha  imali engange $50 endlini wayayigcinisa kulabobaphurofethi besithi bayayikhulekela lendaba leyo yaze yayaphelela emapholiseni kodwa kangisayitholanga lemali yami.

"Ngokubona kwami umntanami angabe watshiywa eselomkhuhlane wakulezinsuku sengahle ngambhalisa lakumasingcwabisane ngoba angifuni kudubeka nxa engatshona.  Bangamaqili njalo balamanga laba baphurofethi, baxhwalisa omama labantwana"; kutsho uMnu Ndlela.

UNkosazana Sisasenkosi Dube ongomunye wezakhamizi laye ukhalaze ngokuthi into eyenzakalayo lapha esiporweni imbi njalo ibehlisa isithunzi bona njengabantu besifazane ngoba kuyibo abadume ngokuvumela ububi busenzakala kubo.

"Kambe ungavumela umuntu oyindoda ekunqunula ethi ukukhipha umnyama, lawe ungowesifazana ulengqondo ezipheleleyo uzwa njani usima phambi kwendoda engasiyo yakho unqunu  usithi ukhutshwa umnyama. Endlini ufika ukhangelane njani lomkakho," kutsho uNksz Dube.

UMthunywa wenelise ukuxhumana lokhansila kaWadi 15 uNkosikazi Tamani Moyo yena okuvumileyo ukuthi abantu sebaluletha kuye udaba lokunqunuliswa kwabesifazane esiporweni.

"Indaba le iyadanisa njalo yehlisa isithunzi samanina ahlala kulelilokitshi nanko phela anqunuliswa ngamadoda la ayabe esithi ayawakhulekela ukuze akhiphe umnyama.

"Ngithe ngisizwa ngalokhu ngasukumela phezulu ngithi ngiyewabona lawo madoda kodwa ngathi ngifika angisazange ngikhulume lababelapho ngoba amanina ayelinde umkhuleko ahle angixotsha," kutsho uNkkz Moyo.

UMthunywa wehlulekile ukuxhumana labaphurofethi labo ngoba kuthiwa bayekhulekisa abantu kwezinye indawo.



Source - uMthunywa